FORACCA-ի կառավարման խորհուրդի երկրորդ նիստը
Մեկնարկից մեկ տարի անց «Հայաստանում անտառների վերականգնում և կլիմայի փոփոխություն» (FORACCA) ծրագիրը հստակ առաջընթաց է գրանցում ինչպես համայնքային, այնպես էլ ինստիտուցիոնալ մակարդակում։
Երևանում կայացած կառավարման կոմիտեի երկրորդ նիստում ՀՀ Կառավարության, Շվեյցարիայի զարգացման և համագործակցության գործակալության (SDC), Անտառների, ձյան և լանդշաֆտային հետազոտությունների շվեյցարական դաշնային ինստիտուտի (WSL), ՄԱԿ-ի Պարենի և գյուղատնտեսության կազմակերպության (FAO), «Հիդրոօդերևութաբանության և մոնիթորինգի կենտրոն» ՊՈԱԿ-ի և Հայաստանի անտառային դաշինքի անդամների՝ «Շեն» ԲՀԿ-ի, «Էյ-Թի-Փի» բարեգործական հիմնադրամի, «Իմ անտառ Հայաստան» բնապահպանական հասարակական կազմակերպության և Վայրի բնության և մշակութային արժեքների պահպանման հիմնադրամի (FPWC) ներկայացուցիչները հանդիպեցին՝ վերանայելու արդյունքները և համաձայնեցնելու գալիք տարվա առաջնահերթությունները։
Համայնքային գործողություններից մինչև ազգային համակարգեր
Անցած տարվա ընթացքում «FORACCA»-ն պլանավորումից անցել է գործողությունների։ Մասնակից համայնքներում վերականգնման և ագրոանտառային գործունեությունը բարելավում է լանդշաֆտները և ստեղծում կենսապահովման նոր հնարավորություններ։
Ըստ «Շեն» ԲՀԿ-ի՝ ամենաակնհայտ արդյունքները համայնքային մակարդակում են, որտեղ ներգրավվածությունն աճում է, իսկ պատասխանատվությունն՝ ամրապնդվում։ Ինչպես նշեց «Շեն» ԲՀԿ վարչության նախագահ Հայկ Մինասյանը. «Գործող համակարգման մեխանիզմների պարզ անհրաժեշտություն կա, քանի որ արդյունավետ իրականացումը կախված է ոչ միայն համայնքի ակտիվ ներգրավվածությունից, այլ նաև ինստիտուցիոնալ համագործակցությունից և շարունակականությունից»։
Միևնույն ժամանակ, առաջընթացն ազգային մակարդակում նպաստում է այս ջանքերին: Կլիմայի մոդելավորման և անտառային մոնիտորինգի համակարգերի բարելավումը նպաստում են անտառային և կլիմայի կառավարման ոլորտում ավելի ճշգրիտ, տվյալահենք որոշումների կայացմանը։
Արդյունավետ գործընկերություններ
Գործընկերությունը FORACCA նախագծի առանցքային ուժեղ կողմն է՝ կապելով տեղական փորձը միջազգային փորձագիտության և ազգային քաղաքականության գործընթացների հետ։
Բացելով հանդիպումը՝ ՀՀ շրջակա միջավայրի փոխնախարար Արա Մկրտչյանը շեշտեց նախաձեռնության ավելի լայն նշանակությունը. «FORACCA-ն համակարգային արձագանք է, որը համատեղում է միջազգային փորձագիտությունը տեղական կարողությունների ամրապնդման հետ և սերտորեն համապատասխանում է Հայաստանի կլիմայական պարտավորություններին»։
Ֆինանսավորող կողմի տեսանկյունից նախագիծը ամուր հիմք է ստեղծել ընդլայնման համար: Ինչպես ընդգծեց Հայաստանում Շվեյցարիայի դեսպանության առաքելության ղեկավարի տեղակալ և Շվեյցարական համագործակցության Հարավային Կովկասի տարածաշրջանային տնօրենի տեղակալ տիկին Ուրսուլա Լաուբլին․ «Ծրագիրը հաջողությամբ անցել է գործողության փուլ՝ հաստատված գործընկերությամբ, և առաջին շոշափելի արդյունքներն արդեն տեսանելի են»։
Հայաստանի անտառային դաշինքը շարունակում է կարևոր համակարգող դեր խաղալ՝ միավորելով անդամ կազմակերպություններին փորձի փոխանակման, մոտեցումների համաձայնեցման և ընդհանուր մարտահրավերներին դիմակայելու համար։
Խոչընդոտների հաղթահարում երկխոսության միջոցով
Հանդիպումը նաև հնարավորություն տվեց քննարկելու ոլորտում առկա մարտահրավերները։
Հողօգտագործման, շրջակա միջավայրի վրա ազդեցության գնահատման (ՇՄԱԳ) ընթացակարգերի և հարկման հետ կապված հարցերը շարունակում են խոչընդոտել ծրագրի իրականացումը։ Գործընկերների կողմից բարձրացվող այս մտահոգություններն ընդգծում են կառույցների միջև համակարգված լուծումների անհրաժեշտությունը։
Նախարարի տեղակալ Արա Մկրտչյանն ընդունեց այս մարտահրավերները՝ նշելով, որ չնայած կարող են պահանջվել ավելի լայն բարեփոխումներ, անհրաժեշտ է նաև մշակել գործնական լուծումներ՝ հրատապ խնդիրները լուծելու համար։
Իրականացնող գործընկերների համար նման երկխոսությունը մնում է կարևոր՝ ապահովելու համար, որ համայնքային մակարդակի ջանքերը կարողանան արդյունավետորեն աջակցվել և մասշտաբավորվել։
Նայելով առաջ. Ազդեցության ընդլայնում և համակարգերի ամրապնդում
Կառավարման խորհուրդը հաստատեց ծրագրի թարմացված տրամաբանական շրջանակը և 2-րդ տարվա աշխատանքային պլանը։ Գալիք տարում ջանքերը կկենտրոնանան վերականգնողական գործողությունների ընդլայնման, կլիմայական տեղեկատվության կիրառման և ազդեցությունը պահպանելու համար անհրաժեշտ կարողությունների զարգացման վրա։
Քանի որ FORACCA-ն թևակոխում է երկրորդ տարին, գործընկերները ջանքերը կենտրոնացնում են ազդեցության ընդլայնման վրա՝ միաժամանակ ամրապնդելով այն աջակցող համակարգերը։
Ծրագիրը նաև ազգային ու միջազգային ավելի լայն համատեքստի մաս է կազմում, որտեղ առաջիկա հնարավորությունները, ինչպիսին է COP17-ը, հարթակ են հանդիսանում Հայաստանի առաջընթացն ընդգծելու և համագործակցությունը խորացնելու համար։
Ծրագրի մոտեցմանն անդրադառնալով՝ Ուրսուլա Լաուբլին ընդգծեց. «Տեխնիկական փորձագիտության համադրումը տեղական գիտելիքների հետ և համայնքային գործողությունների կապակցումը ազգային երկխոսության հետ մնում են առանցքային՝ իմաստալից և երկարատև արդյունքների հասնելու համար»։
Համատեղ հանձնառություն
Հանդիպումն ավարտվեց բոլոր գործընկերների միջև համատեղ պատասխանատվության բարձր գիտակցմամբ։
FORACCA-ն շարունակում է ցույց տալ, որ անտառների վերականգնումը միայն ծառեր տնկելը չէ․ այն դիմակայուն համակարգերի կառուցումն է, համագործակցության ամրապնդումը և համայնքների հզորացումը։ «Շեն» ԲՀԿ-ն շարունակում է հավատարիմ մնալ այս տեսլականին՝ համագործակցելով գործընկերների հետ, որպեսզի վերականգնման ջանքերը հանգեցնեն երկարատև բնապահպանական և սոցիալական օգուտների ամբողջ Հայաստանում։
Հայաստանում անտառների վերականգնում և կլիմայի փոփոխություն» (FORACCA) ծրագիրը համաֆինանսավորվում է Շվեյցարիայի զարգացման և համագործակցության գործակալության (SDC) և Հայաստանի անտառային դաշինքի անդամ չորս իրականացնող կազմակերպությունների՝ «Շեն» բարեգործական հասարակական կազմակերպության, «Իմ անտառ Հայաստան» բնապահպանական հասարակական կազմակերպության, «Էյ-Թի-Փի» բարեգործական հիմնադրամի և Վայրի բնության և մշակութային արժեքների պահպանման հիմնադրամի կողմից։ Ծրագրի իրականացման գործընկերներն են նաև Անտառների, ձյան և լանդշաֆտային հետազոտությունների շվեյցարական դաշնային ինստիտուտը (WSL) և ՄԱԿ-ի Պարենի և գյուղատնտեսության կազմակերպությունը (FAO):
